Лівійскія спецназаўцы трэніраваліся ў Беларусі
Трэніроўка лівійскага спецназу / facebook.com/Libya.WID
Лівійскія вайскоўцы прайшлі ў Беларусі курсы падвышэння кваліфікацыі. Пра гэта ў сацсетках паведаміла Лівійская нацыянальная армія (ЛНА), заўважыла Радыё Свабода.
Фатаздымкі падрыхтоўкі вайскоўцаў 36-га батальёна спецназу выклала ў сацсеткі прэс-служба ЛНА. Хутчэй за ўсё, яны былі зробленыя ў Беларусі пад канец лютага 2025 года. У кадрах фігуруе навучальны цэнтр МУС "Волаўшчына", дзе навучаюцца і беларускія спецназаўцы.
Батальён спецназу падпарадкоўваецца сыну лідара Лівійскай нацыянальнай арміі Садаму Хафтару. У паведамленні гаворыцца, што падрыхтоўка лівійцаў у Беларусі праходзіла ў адпаведнасці з загадам кіраўніка ЛНА Халіфа Абу аль-Касіма Хафтара.
Дарэчы, сёлета вярхоўны галоўнакамандуючы ЛНА Халіф Хафтар прыязджаў да Лукашэнкі. Летась Лукашэнка сустракаўся з яго сынам Садамам Хафтарам, а пасля гэтага з'явілася інфармацыя пра пастаўкі беларускай зброі ў Лівію.
