Латвія апублікавала свежы "чорны спіс": у ім прэс-сакратарка МУС і сын Балабы

Латвія апублікавала свежы санкцыйны спіс абаронцаў рэжыму Аляксандра Лукашэнкі. У яго ўвайшлі 118 прозвішчаў: гэтым людзям забаронены ўезд на тэрыторыю краіны. Неўзабаве такія ж спісы павінны апублікаваць Літва і Эстонія.

У новы спіс трапілі:

— начальнік 3-га ўпраўлення ГУБАЗіК Міхаіл Бендукевіч;

— прэс-сакратарка МУС Вольга Чамаданава і яе муж — афіцэр ГУБАЗіК Дзяніс Чамаданаў;

— афіцыйная прадстаўніца мінскага ўпраўлення Следчага камітэта Кацярына Гарлінская;

— Арцём Балаба — сын кіраўніка мінскага АМАП Дзмітрыя Балабы;

— пракурорка Аліна Касьянік, якая была дзяржабвінаваўцай у справе журналістак тэлеканала "Белсат";

— шмат камандзіраў АМАП і міліцэйскіх кіраўнікоў з беларускіх рэгіёнаў.

Што цікава, у спіс трапіў і падпалкоўнік Станіслаў Лупаносаў, якога ГУБАЗік назваў "кратом".

"Згаданыя службовыя асобы прымалі ўдзел у гвалтоўным задушэнні мірных пратэстаў пасля непрызнання Еўрапейскім Саюзам выбараў прэзідэнта 9 жніўня 2020 года", — так тлумачацца санкцыі. Агулам уезд у Латвію забаронены 277 грамадзянам Беларусі.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.