Кошты арэнды мінскіх офісаў упалі да найніжэйшага ўзроўню за 9 гадоў

Сярэдні кошт арэнды мінскіх офісаў панізіўся да найніжэйшага ўзроўню за апошнія дзевяць гадоў — 17,7 еўра з ПДВ за квадратны метр, паведаміла кіраўнік праектаў па адміністрацыйнай нерухомасці “Твая сталіца. Нерухомасць для бізнесу” Наталля Новікава.

Да гэтага такімі ж нізкімі, як цяпер, арэндныя стаўкі на офісныя памяшканні былі толькі ў другім квартале 2006 года. “Аднак тады рынак камерцыйнай нерухомасці толькі фармаваўся, а цікавыя офісныя аб’екты можна было пералічыць па пальцах. Зараз жа, насупраць, арандатарам ёсць з чаго выбіраць. Збольшага менавіта перанасычанне рынка сучаснымі плошчамі абрынула арэндныя стаўкі ў першым паўгоддзі гэтага года”, - распавяла эксперт БелаПАН.

Паводле яе слоў, стаўкі арэнды на офісы ў Мінску з пачатку года знізіліся прыкладна на 20%. У цяперашні час за квадратны метр у бізнес-цэнтрах класа A просяць 24 еўра з ПДВ, B — 17,5 еўра, C — 12,5 еўра. Пры гэтым рыначныя стаўкі, па якіх здзяйсняюцца здзелкі, могуць быць ніжэй на 10%. Самыя выгадныя ўмовы прапануюць ўладальнікі новых аб’ектаў, якія і “задаюць тон на рынку”, адзначыла прадстаўнік групы кампаній “Твая сталіца”.

У Мінску з пачатку года ўведзена 18 тыс. Кв. м плошчаў у бізнэс-цэнтрах. Да канца года чакаецца ўвод яшчэ каля 128 тыс. Кв. м. Знакавымі для горада аб'ектамі з'яўляюцца 26-павярховы будынак пры шматфункцыянальным комплексе (МФК) "Тытан", бізнес-цэнтр са SPA Riviera Plaza, 17-павярховы офісны будынак пры МФК "Цівалі", бізнес-цэнтры "Красавiк", "Арлан" і комплекс Mercure.

Фота: pora-valit.livejournal.com