Колькі грошай улада ўжо выдаткавала на будучы ідэалагічны фільм “Класная”

На вытворчасць ігравога ідэалагічнага фільма “Класная” ўлады на гэты момант выдаткавалі 784 953,17 беларускіх рублёў (ці ў пераліку па курсе Нацбанка — 245 тысяч долараў). Прэм’ера стужкі прызначана на восень 2025 года.

Еўрарадыё атрымала гэтую лічбу, падрахаваўшы 74 завершаныя і актуальныя дзяржзакупкі, праведзеныя са жніўня 2024 года па сакавік 2025 года. Паколькі вытворчасць фільма яшчэ працягваецца, выдаткі на яго будуць большымі.

Хто здымае фільм “Класная” і пра што ён

Ідэя зняць фільм пра настаўнікаў з’явілася ў верасні 2023 года падчас пасяджэння аб якасці адукацыі. Тады дырэктарка мінскай школы №73 Ірына Родзік прапанавала стварыць кінастужку, якая папулярызавала б прафесію настаўніка. 

Ініцыятыву падтрымаў Аляксандр Лукашэнка, паабяцаўшы фінансаванне і падкрэсліўшы, што настаўнікі павінны дапамагчы кіношнікам зрабіць фільм аб'ектыўным, але з выразным станоўчым пасылам.

Спачатку кінастудыя "Беларусьфільм", якой даручылі вытворчасць, прызначыла кіраўніком праекта рэжысёра Аляксандра Яфрэмава (“Павадыр”, “Ліст чакання”), а сюжэт павінен быў напісаць сцэнарыст Валянцін Залужны. 

Абодва кінематаграфісты ўжо працавалі разам над ідэалагічнай драмай "Ліст чакання", якая расказвае пра кардыёлага, які адмаўляецца з’язджаць з Беларусі ў Германію дзеля працаўладкавання. Залужны пачаў збор матэрыялаў, наведваў школы і сустракаўся з педагогамі, каб грунтоўна прапрацаваць тэму.

Аднак пазней планы змяніліся, і пастаноўку перадалі маладому рэжысёру Кірылу Халецкаму, вядомаму па ідэалагічнай стужцы "Культурны код" і вытворчай камедыі “Кіношнікі”. 

Цікава, што першапачаткова Халецкі павінен быў працаваць над беларуска-кітайскім праектам "На векі вечныя", але магчыма праз праблемы з пошукам актораў яго перакінулі на "Класную". 

Яфрэмаў жа аказаўся па-за межамі гэтага праекта і, магчыма, не будзе прымаць удзел у вытворчасці.

Спачатку стужка праходзіла пад працоўнай назвай "Класная дама", але пазней была перайменаваная проста ў "Класную". Здымкі распачаліся ў студзені 2025 года. 

Сюжэт круціцца вакол 22-гадовай выпускніцы БДПУ, якая ўсё жыццё пражыла ў Мінску, але пасля размеркавання трапляе ў сельскую мясцовасць, дзе становіцца класным кіраўніком 11-га класа. Галоўная гераіня праходзіць шлях адаптацыі, спрабуе знайсці агульную мову з вучнямі і ў выніку пераадольвае цяжкасці, становячыся сапраўдным педагогам.

Адну з роляў выканае актор і міністр культуры Руслан Чарнецкі — ён сыграе кіраўніка камісіі па размеркаванні, які адпраўляе галоўную гераіню ў аграгарадок адпрацоўваць. 

Прэм’ера “Класнай” запланаваная на восень 2025 года — альбо да Дня ведаў, альбо да паказу ў межах кінафестывалю "Лістапад". 

Як і “Ліст чакання”, “На іншым беразе”, “Час вяртацца”, “Класная" працягвае серыю ідэалагічных фільмаў ад дзяржстудыі "Беларусьфільм". Мэта — павышэнне прэстыжу бюджэтных прафесій, у дадзеным выпадку настаўнікаў, які ва ўмовах вострага недахопу кадраў з-за эміграцыі і палітычных рэпрэсій, рэзка дэвальваваўся.