"Кашалёк Лукашэнкі" набыў для сябе і сям'і "залатыя" пашпарты Вануату — "Бюро"

Бізнесовец Аляксей Алексін набыў "залаты" пашпарт Вануату. На дакументы для сябе і сваякоў "кашалёк" Лукашэнкі мог патраціць каля 390 тысяч долараў. Хутчэй за ўсё, пашпарты набываліся для абыходу санкцый.

Журналісты-расследвальнікі з "Бюро" даведаліся, што "залатыя" пашпарты Вануату яшчэ ў 2022 годзе атрымалі тытунёвы магнат Аляксей Алексін і яго малодшы сын Віталь разам з новаспечанай жонкай Надзеяй (у дзявоцтве Зайцавай).

Рэспубліка Вануату размяшчаецца на 83 астравах у Ціхім акіяне. Яна праславілася даступным грамадзянствам і афшорнымі паслугамі. Архіпелаг спецыялізуецца на продажы так званых "залатых" пашпартоў, якія каштуюць па 130 тысяч долараў. Такі пашпарт выдаецца ў рэкордна кароткія тэрміны — ад 1 да 4 месяцаў. Дакумнт дазваляе бязвізавыя паездкі ў 130 краін свету, у тым ліку і ў Еўрасаюз.

Але ўсімі бонусамі пашпартоў Вануату Алексіны, як выгляае, скарыстацца так і не здолеюць. Акурат у 2022 годзе Савет Еўропы прыпыніў бязвізавы рэжым для "грамадзян Вануату". Прычынай сталі якраз сумнеўныя і лёгкадаступныя схемы набыцця пашпарта. У снежні 2024-га ЕС канчаткова адмяніў бязвізавы рэжым з Вануату.

На пытанне "Бюро" пра пашпарты Вануату Аляксей Алексін сказаў, што не чуе, і слухаўку больш не здымаў. Яго сын Віталь сказаў, што не ведае пра пашпарт Вануату: "У мяне толькі беларускі пашпарт, сіненькі". Пасля гэтага ён абарваў дыялог.