Канапацкая абурылася граматай, уручанай Шуневічу ад імя парламента

Апазіцыйная дэпутатка Ганна Канапацкая абурылася тым, што Нацыянальны сход узнагародзіў міністра ўнутраных спраў Ігара Шуневіча граматай за "“дзейнасць па ўмацаванні правоў і свабод грамадзян". Пра гэта Канапацкая напісалал на сваім акаўнце ў Фэйсбуку. 

"Абуральна, што пасля ўсяго, што здарылася гэтай вясной у нашай краіне, пасля брутальных разгонаў мірных вулічных акцый міліцыяй, пасля затрыманняў паўтары сотні журналістаў, больш за тысячу мірных грамадзян, велізарнай колькасці штрафаў і сутак арышту, негатыўнай рэакцыі на тое, што адбылося еўрапейскіх краін, міністр унутраных спраў Шуневіч атрымлівае падзякавальную грамату ад імя Нацыянальнага сходу. Як дэпутат Нацыянальнага сходу заяўляю: сваёй згоды на гэтае ўзнагароджанне я не давала, магчыма, не давалі і іншыя дэпутаты. Праца міністэрства выклікае ўсё больш і больш пытанняў, а ніяк не грамат і падзяк", — заявіла прадстаўніца Аб'яднанай грамадзянскай партыі.
 
Пра ўзнагароджанне міністра Шуневіча стала вядома 31 траўня на сумесным пасяджэні абедзвюх палатаў Нацыянальнага сходу.