Камітэт Еўрапарламента ўхваліў пошліны на беларускія ўгнаенні
Угнаенні, ілюстрацыйнае фота
Камітэт па міжнародным гандлі Еўрапаламента ўхваліў 50-адсоткавае павышэнне пошлін на некаторыя сельскагаспадарчыя тавары з Беларусі і Расіі. Пошліны будуць уведзеныя на прадукцыю, якая раней імі не абкладалася. Пад іх трапяць цукар, воцат, мука і кармы для жывёлаў.
Таксама ў Еўрапарламенце прапанавалі ўвесці новыя пошліны на ўгнаенні: да 2028 года яны павялічацца да 430 еўра за тону. Еўрадэпутаты адзначаюць, што такія меры мусяць прывесці да скарачэння імпарту беларускіх і расійскіх угнаенняў у ЕС, што дазволіць дыверсіфікаваць іх вытворчасць у Еўрасаюзе.
"Гэта палажэнне аб паступовым павышэнні мытных пошлін на прадукцыю з Расіі ды Беларусі дапаможа перашкодзіць Расіі выкарыстоўваць рынак ЕС для фінансавання сваёй ваеннай машыны", — пракаментавала пастаянная дакладчыца па Расіі ў Еўрапарламенце Інэсе Вайдэрэ.
Канчатковае галасаванне па гэтай прапанове адбудзецца ў Еўрапарламенце 22 траўня.
Раней прапанову павысіць пошліны на беларускія і расійскія ўгнаенні агучыў Савет ЕС. Супраць гэтага выступае лабісцкае аб'яднанне фермераў Copa-Cogeca. Там мяркуюць, што такая мера можа прынесці сур'ёзную эканамічную шкоду для сельскай гаспадаркі ЕС.
