Індыя і Пакістан дамовіліся аб спыненні баявых дзеянняў

Індыя і Пакістан дамовіліся аб спыненні баявых дзеянняў. Пра гэта заявіў прэзідэнт ЗША Дональд Трамп:

"Пасля доўгай ночы перамоваў пры пасрэдніцтве Злучаных Штатаў я рады абвясціць, што Індыя і Пакістан дамовіліся аб поўным і неадкладным спыненні агню. Віншую абедзве краіны з ужываннем здаровага сэнсу і вялікага розуму. Дзякуй за вашу ўвагу да гэтага пытання".

Што за канфлікт?

І так не вельмі добрыя адносіны паміж краінамі сапсаваліся пасля таго, як тэрарысты расстралялі 26 турыстаў у індыйскай частцы Кашміра. МЗС Індыі ануляваў візы, выдадзеныя пакістанцам, і спыніў рух праз адзіны пункт перасячэння сухапутнай мяжы.

У ноч на 7 траўня Індыя абвясціла пра пачатак ваеннай аперацыі "Сіндур" супраць тэрарыстаў. Гэтак індыйскія ўлады адказалі на напад узброеных баевікоў на турыстаў на тэрыторыі Джаму і Кашмір, які адбыўся 22 красавіка. Тады 26 чалавек загінулі, а дзясяткі атрымалі раненні. Адказнасць за тэракт узяла на сябе групоўка "Фронт супраціву".

Індыя нанесла ўдары па падкантрольнай Пакістану частцы Кашміра. У Нью-дэлі заявілі, што цэлямі сталі лагеры тэрарыстаў, дзе размяшчаюцца штабы і навучальныя цэнтры ісламісцкіх тэрарыстычных груповак. Пакістан заявіў, што ў адказ збіў пяць індыйскіх знішчальнікаў і знішчыў штаб армейскай брыгады. Абедзве дзяржавы валодаюць ядзернай зброяй.