Грамадзяніна Латвіі асудзілі за "дыскрэдытацыю Беларусі" на 6 гадоў калоніі
Мінскі абласны суд / ПЦ "Вясна"
Шэсць гадоў калоніі ўзмоцненага рэжыму прысудзілі грамадзяніну Латвіі Юрыйсу Ганінсу. Яго справу разглядалі ў Мінскім абласным судзе.
Як паведамляе праваабарончы цэнтр "Вясна", мужчыну прызналі вінаватым па трох артыкулах Крымінальнага кодэкса — дыскрэдытацыя Беларусі (арт. 369-1 КК), паклёп на Лукашэнку (ч. 2 арт. 367 КК) і заклікі да санкцый (ч. 2 арт. 361 КК).
Суддзя Аляксандр Рыбакоў вынес прысуд яшчэ 19 лютага, але вядома пра яго стала толькі цяпер. Працэс адбываўся ў закрытым рэжыме, дэталі абвінавачвання невядомыя.
Паводле інфармацыі праваабаронцаў, цяпер у беларускіх месцах няволі ўтрымліваюцца 36 палітзняволеных замежнікаў, у тым ліку чацвёра грамадзян Латвіі.
