Філосаф Уладзімір Мацкевіч збіраецца пераходзіць да сухой галадоўкі

За кратамі Мацкевіч знаходзіцца ўжо больш за паўгода. Летась яму выставілі абвінавачанне ў "арганізацыі дзеянняў, якія груба парушаюць грамадскі парадак".

Палітвязень пачаў галадоўку 4 лютага і адразу папярэдзіў, што пасля дзесяці дзён "галадоўкі на вадзе" ён гатовы перайсці "да сухой галадоўкі". Днямі ён перадаў праз адваката, што "панядзелак — крытычны дзень: у панядзелак я яшчэ буду піць ваду, у панядзелак яшчэ нешта могуць вырашыць". Калі ж яго патрабаванні не выканаюць, у аўторак Уладзімір Мацкевіч пераходзіць да сухой галадоўкі.

Беларусы ў розных гарадах Еўропы (Варшаве, Вільні, Познані, Лондане, Адэсе, Стакгольме і іншых) правялі акцыі ў падтрымку Мацкевіча. Яны асудзілі бяздзейнасць уладаў Беларусі.

Калегі і сваякі Уладзіміра Мацкевіча падкрэсліваюць, што надыходзіць крытычны перыяд у галадоўцы: кожны дзень можа прывесці да раптоўных пагаршэнняў здароўя і смерці.