Эколагі "апраўдалі" бабра, які нібыта асушыў возера ў Лепельскім раёне

Эколагі высветлілі сапраўдную прычыну, з якой перасохла возера Кастрыцкае ў Лепельскім раёне.

Здарэнне адбылося пад канец ліпеня. Мясцовыя жыхары вінавацілі бабра, які пракапаў нару ў цэнтры дамбы. Маўляў, гэтая нара ў спалучэнні з моцнымі дажджамі прывяла да разбурэння дамбы, а ў выніку на месцы возера ўтварылася топкае балота, у якім загінула рыба. Звароты ў сельсавет па дапамогу плёну не прынеслі.

Пазней паведамлялася, што бабра ў возеры мясцовы жыхары пасля гэтага не бачылі.

Як паведамляе тэлеканал АНТ, эколагі ўвогуле не знайшлі слядоў бабра ў возеры. Па словах эксперта, асноўнай прычынай сталі моцныя ападкі, якія выклікалі размыў берагоў і пашкоджанне дамбы.

Аднавіць вадаём магчыма, калі засыпаць прамывіну і ўмацаваць дамбу. Для гэтага неабходная цяжкая спецтэхніка.