Дзяцей у Беларусі законам абавяжуць паважаць дзяржаўныя сімвалы

Цяпер дзеці ў Беларусі павінны "паважаць дзяржаўныя сімвалы РБ" і "захоўваць гістарычную памяць аб гераічным мінулым беларускага народа". Адпаведныя патрабаванні змешчаныя ў законе "Аб змяненні законаў па пытаннях забеспячэння правоў дзяцей". Сёння ён апублікаваны на Нацыянальным прававым інтэрнэт-партале. 

Таксама ў законе зменены артыкул аб праве на свабоду аб'яднанняў. Раней дзеці маглі ствараць аб'яднанні, чыя дзейнасць не была накіраваная на гвалтоўнае змяненне канстытуцыйнага ладу і не прапагандавала вайну і варожасць. Цяпер гэты артыкул дазваляе ствараць дзіцячыя грамадскія аб'яднанні, калі яны не накіраваныя на "тэрарыстычную і экстрэмісцкую дзейнасць".

Новы закон уводзіць дадатковыя абмежаванні на працу з дзецьмі. Яны датычаць педагагічнай дзейнасці і права займаць пасады, звязаныя з выхаваннем. Раней гэта было забаронена толькі забойцам і людзям, якія ўчынілі іншыя цяжкія злачынствы. Цяпер жа пад забарону трапілі і палітычныя апаненты рэжыму Лукашэнкі, асуджаныя за "здзяйсненне злачынстваў экстрэмісцкай накіраванасці". Прычым забарона распаўсюджваецца нават на тых, у каго пагашаная "экстрэмісцкая" судзімасць або спынены пераслед.

Асноўныя палажэнні закона набываюць моц праз 6 месяцаў пасля яго афіцыйнага апублікавання.