Для рэжыму Лукашэнкі час слаць сігналы аб згаворлівасці Трампу — Тышкевіч

Аналітык украінскага Інстытута будучыні Ігар Тышкевіч пракаментаваў адсутнасць Беларусі ў амерыканскім спісе новых тарыфаў.

"Афіцыйна, як і ў дачыненні да РФ ёсць тэзіс Вашынгтона "мы з імі не гандлюем", — піша ён. — У рэальнасці гэта азначае, што пакуль што надзея на нейкі аналаг рэсурснай угоды з ЗША ў Мінска застаецца. Хоць бы па калійцы. Але тут ёсць магутны канкурэнт — гэтую ж тэму, дарэчы, прасоўвае і РФ. Пытанне толькі ў тым, хто прапануе лепшыя ўмовы і як у асяроддзі Трампа паставяцца да ідэі сепаратных дамоўленасцяў з асяроддзем Лукашэнкі".

Тышкевіч мяркуе, што для рэжыму Лукашэнкі час слаць сігналы аб згаворлівасці Дональду Трампу і прапаноўваць амерыканцам умовы.

"Але тут пытанне ўпіраецца ў прагнасць аднаго асобна ўзятага беларуса, які ў тым ліку зняволеных успрымае як прадмет, звычайны тавар, — працягвае аналітык. — Не разумеючы, што для каманды Трампа гэтая тэма пра сігналы быць згаворлівымі, але ніяк не пра прадмет вялікага гандлю — прапанова павінна быць завязана на іншыя рэсурсы. Але нешта мне падказвае, што ганцы з Мінска ў бліжэйшыя тыдні такі паспрабуюць даляцець да Вашынгтона".

Дональд Трамп аб'явіў 2 красавіка "Днём вызвалення Амерыкі" і ўвёў павальныя тарыфы на імпарт тавараў у ЗША.