Трамп аб'явіў усяму свету гандлёвую вайну

Дональд Трамп аб'явіў усяму свету гандлёвую вайну. Амерыканскі прэзідэнт уводзіць павальныя тарыфы на імпарт тавараў у ЗША. Ён аб'явіў 2 красавіка "Днём вызвалення Амерыкі".

"Гэта адзін з самых важных дзён у амерыканскай гісторыі, гэта — дэкларацыя амерыканскай эканамічнай незалежнасці, — гаварыў Трамп. — Мы зноў зробім Амерыку вялікай і багатай. Нашу краіну абдзіралі больш за 50 гадоў. Такога больш не будзе".

У спісе 184 краіны. Супраць Кітая ўведзены тарыф у 34%, Еўрасаюза — 20%, Японіі — 24%, Індыі — 26%. Самыя высокія пошліны ўведзены супраць Шры-Ланкі (44%), В'етнама (46%) і Камбоджы (49%). "Мінімальны базавы тарыф" складае 10%. Тарыфы пачнуць дзейнічаць 5-9 красавіка.

Кіраўніца Еўракамісіі Урсула фон дэр Ляен назвала ўведзеныя Дональдам Трампам тарыфы "сур'ёзным ударам па бізнесе і спажыўцам ва ўсім свеце". Еўрасаюз гатовы адказаць, каб абараніць свае інтарэсы. "Але ёсць альтэрнатыўны шлях, яшчэ не позна весці перамовы", — заявіла яна. Кітай таксама рыхтуецца прыняць "жорсткія контрмеры".

У спісе няма Беларусі, як і Расіі, Кубы, КНДР. Прычына — гэтыя краіны "ўжо сутыкаюцца з надзвычай высокімі тарыфамі", а раней уведзеныя амерыканскія санкцыі "перашкаджаюць любой значнай гандлёвай дзейнасці з гэтымі краінамі".

З чацвярга пачынаюць дзейнічаць 25-адсоткавыя пошліны на імпарт аўтамабіляў у ЗША.

Трамп абвясціў надзвычайнае становішча ў ЗША з-за пагрозы дэфіцыту гандлёвага балансу.