Цяпло ў Беларусь вернецца з 20 траўня — сіноптыкі
Дождж, ілюстрацыйнае фота / pexels.com
У пятніцу, 16 траўня, у Беларусі прагназуецца воблачнае з праясненнямі надвор'е, паведамляе Белгідрамет.
На большай частцы тэрыторыі краіны пройдуць дажджы, удзень па ўсходзе Беларусі месцамі чакаюцца моцныя дажджы. У сувязі з гэтым сіноптыкі абвясцілі жоўты ўзровень небяспекі. У асобных раёнах магчымыя навальніцы. Вецер уначы будзе пераменных кірункаў — ад слабога да ўмеранага, удзень — паўднёвы, паўднёва-ўсходні парывісты.
Тэрмометры ўначы пакажуць 1-7 градусаў цяпла, але месцамі, а па Брэсцкай вобласці — у многіх раёнах чакаюцца замаразкі ад 0 да 3 градусаў марозу. Удзень прагназуецца +9...+15, месцамі будзе 7-8 градусаў вышэй за нуль.
Прыкладна такое ж хмарнае, прахалоднае і дажджлівае надвор'е захаваецца да канца тыдня. Паводле прагнозаў сіноптыкаў цяпло ў Беларусь вернецца не раней за 20 траўня.
