Ціханоўская і Лукашэнка павіншавалі Украіну з Днём Незалежнасці. Па-рознаму

24 жніўня Украіна адзначае Дзень Незалежнасці. У сваім тэлеграм-канале лідарка дэмісіл Святлана Ціханоўская звярнулася да прэзідэнта Уладзіміра Зяленскага і ўкраінцаў, нагадаўшы, што ўжо чацвёрты год украінскі народ сустракае гэтае свята ва ўмовах поўнамаштабнай вайны.

“Вам даводзіцца плаціць найвышэйшую цану за сваю незалежнасць. Але вы бароніце не толькі сваю зямлю — вы бароніце права ўсіх людзей жыць у свабодзе.

Вашая стойкасць і адвага сталі светлым прыкладам для ўсяго свету. Але асабліва — для беларусаў.

Мы разумеем ваш боль. Мы падтрымліваем вашу барацьбу. Беларусы і беларускі — побач з вамі. З вамі нашыя добраахвотнікі на фронце, нашыя валанцёры і актывісты. Беларусы з усяго свету ахвяруюць сродкі. А ў турмах лукашэнкаўскага рэжыму — сотні беларусаў, якія пацярпелі за падтрымку Украіны. І мы працягваем змагацца за іх вызваленне”, — піша Ціханоўская.

Яна звяртае ўвагу, што ў Беларусі з Украінай адзін вораг — расійскі імперыялізм, які прынёс вайну, а нашу краіну зрабіў закладніцай.

“Але мы ведаем: вашая перамога дасць шанец на свабоду і Беларусі. Без свабоднай Украіны не будзе свабоднай Беларусі. Гэтаксама як і без свабоднай Беларусі не будзе бяспечнай Еўропы.

Беларусаў і ўкраінцаў аб’ядноўвае не толькі слаўная гісторыя, але і супольная будучыня — у еўрапейскай сям’і свабодных народаў. І я веру, што гэты дзень абавязкова настане.

І сёння, у ваш дзень Незалежнасці, зычу вам сілы, каб выстаяць і адстаяць свабоду. Зычу вам трывалага і справядлівага міру, які ўкраінскі народ безумоўна заслугоўвае”, — піша Ціханоўская

У звароце Аляксандра Лукашэнкі, апублікаваным ягонай прэс-службай, адзначаецца, што “жыць побач у міры і згодзе спрадвеку было прызначэннем беларускага і ўкраінскага народаў”.

“Як бы ні цягнулі ў розныя бакі знешнія сілы, Беларусь і далей застаецца адкрытай для ўкраінцаў. Мы настроены на ўзаемавыгаднае супрацоўніцтва і канструктыўны дыялог з нашымі паўднёвымі суседзямі.

Ад усяго сэрца жадаю грамадзянам Украіны знайсці ўласны адказ на сённяшнія выклікі, а вашай шматнацыянальнай краіне — мірнага неба, салідарнасці і па-сапраўднаму незалежнага развіцця”, — піша Лукашэнка.