Ціханоўская і Латушка атрымалі пагрозы забойствам

Павел Латушка даў паказанні раённай камендатуры паліцыі Варшавы. Гэта звязана з тым, што на адрас Святланы Ціханоўскай і самога Латушкі былі агучаныя пагрозы забойствам. Інфармацыя была публічнага характару, паведамляецца ў тг-канале Латушкі.

"Пасля правядзення дазнання сабраныя матэрыялы і доказы накіраваныя камендатурай паліцыі на адрас акруговага пракурора Варшавы з мэтай прыняцця рашэння аб далейшых працэсуальных дзеяннях. Асабістыя звесткі асобы, якая адрасавала пагрозы на адрас Святланы Ціханоўскай і Паўла Латушкі, былі ідэнтыфікаваныя дзякуючы арганізацыі BELPOL", — гаворыцца ў паведамленні.

Адзначаецца, што пагрозы сыходзілі ад асобы, якая пражывае на тэрыторыі Польшчы. Паколькі адзін з адрасатаў (Латушка) таксама пражывае ў гэтай краіне, расследаванне знаходзіцца ў юрысдыкцыі Польшчы.

"Мы адзначаем, што за апошнія месяцы колькасць пагроз, правакацый і іншых супрацьпраўных дзеянняў значна ўзрасла. Усе гэтыя пагрозы накіраваныя супраць дзейнасці дэмакратычных інстытутаў, якія з'яўляюцца альтэрнатывай рэжыму Лукашэнкі", — пракаментаваў Латушка.

Раней Латушка даў паказанні ваеннаму пракурору Нацыянальнай пракуратуры Польшчы пра факты пагроз, шантажу, подкупу і спробаў вярбоўкі з боку спецслужбаў рэжыму Лукашэнкі ў дачыненні да супрацоўнікаў НАУ і дэлегатаў Каардынацыйнай Рады.