"Чорны шымпанзэ" — так футбаліст "Віцебска" назваў гульца "Смаргоні"
Крысціян Інтсоен / ФК "Смаргонь"
У беларускім футболе разгарэўся расісцкі скандал.
Нападнік футбольнага клуба "Віцебск" Валерый Гарбачык падчас матчу са "Смаргонню" абразіў абаронцу праціўнікаў, паведамляе тэлеграм-канал пра беларускі футбол "Ухо".
Паводле відавочцаў, гулец віцяблянаў назваў выхадца з Камеруна Крысціяна Інтсоена "чорным шымпанзэ".
Арбітр сустрэчы Ігар Шумілаў паказаў прамую чырвоную картку форварду "Віцебска".
Цяпер Гарбачыку пагражае дыскваліфікацыя на тэрмін ад 5 да 15 матчаў і/ці часовая або бестэрміновая забарона на наведванне футбольных матчаў на пэўным стадыёне. Акрамя таго, яго могуць адначасова аштрафаваць на суму ад 2100 да 4200 рублёў (ад 50 да 100 базавых велічыняў).
