Часам расійская ядзерная зброя ў Беларусі ёсць — чыноўнік NATO

Цяпер у Беларусі расійскай ядзернай зброі няма, але яна магла там знаходзіцца. Так высокапастаўлены чыноўнік NATO адказаў на пытанне аб размяшчэнні боегаловак на нашай тэрыторыі.

"Мы ўвесь час бачым паведамленні пра гэта. Часам у Беларусі сапраўды магла знаходзіцца расійская ядзерная зброя. Часам янао там ёсць, часам — не. У цяперашні час няма пастаяннай прысутнасці ядзернай зброі з Расіі", — прыводзіць "Зеркало" яго адказ.

Журналісты спыталіся, ці павялічыцца пагроза для NATO і Украіны, калі ў беларусь паставяць расійскія ракеты "Арэшнік" (мяркуецца, што гэта можа адбыцца бліжэй да восені 2025-га).

"Арэшнік" як балістычная сістэма сярэдняй далёкасці мае значны радыус дзеяння, каб з тэрыторыі Расіі пагражаць саюзнікам у NATO і Украіне. Так што стратэгічныя наступствы яго размяшчэння ў Беларусі адносна невялікія. Але гэта сігнал для NATO. Такая зброя падвойнага прызначэння, якая валодае высокім патэнцыялам і размешчаная ў іншай краіне, з'яўляецца стратэгічным пасланнем", — падкрэсліў прадстаўнік NATO.

Таксама ён заявіў, што Беларусь адыграла вельмі важную ролю ў пачатку расійскай агрэсіі супраць Украіны і працягвае гэта рабіць цяпер, падтрымліваючы блізкія стасункі з Расіяй. "Украінцы павінны ўвесь час хвалявацца, што іх можа чакаць зь беларускай тэрыторыі. У больш шырокім сэнсе мы назіраем за тым, як Расія можа выкарыстоўваць вашу краіну ў сваіх мэтах. Там размешчаныя войскі, з'яўляецца ядзерная зброя і "Арэшнік", — адзначыў чыноўнік NATO. Але ў цэлым, кажа ён, непасрэдна на ваенныя дзеянні гэта ўплывае не моцна.

Пра пастаўку ў Беларусь першых ядзерных боегаловак Пуцін заявіў яшчэ ўлетку 2023 года. У лістападзе 2024-га BELPOL апублікаваў расследаванне, у якім гаварылася, што няма ніякіх доказаў наяўнасці такой зброі на тэрыторыі Беларусі. У снежні таго ж года Лукашэнка заявіў, быццам такіх боегаловак — ужо "не адзін дзясятак штук".