Былая ідэалагіня Лукашэнкі абурылася, што беларускі позна і мала нараджаюць

Беларускі павінны больш нараджаць, каб цяперашняе пакаленне не засталося без пенсіі. Пра гэта на прэс-канферэнцыі з нагоды Дня жанчын заявіла старшыня праўладнага Беларускага саюза жанчын (БСЖ), былая начальніца галоўнага ідэалагічнага ўпраўлення Адміністрацыі Лукашэнкі (2018-2021) Вольга Шпілеўская.

"Дэмаграфія — гэта тая гісторыя, якую трэба паляпшаць, інакш праўда няма каму будзе плаціць нам пенсію. Калі мы з вамі выйдзем на пенсію, нам няма каму будзе яе плаціць, няма каму будзе працаваць" , — прыводзіць яе словы выданне "Позірк".

Паводле Шпілеўскай, беларускі ў сярэднім выходзяць замуж у 27 гадоў і ў гэтым жа веку нараджаюць першынцаў. "А ў Мінску гэта наогул 30 гадоў — гэта нікуды не пасуе. Да гэтага ўзросту трэба мець ужо хоць бы дваіх дзетак", — абураецца яна.

Кіраўніца БСЖ заяўляе, што кожнай жанчыне варта "памятаць наказ нашага жаночага прэзідэнта: трое дзетак". У самой яе, дарэчы, толькі адно дзіця — дарослая дачка, а на прэс-канферэнцыі жанчына паведаміла, што разведзеная.

Таксама кіраўніца БСЖ прызналася, што кіраваная ёй арганізацыя для павышэння нараджальнасці выконвае функцыю свацці. Менавіта з гэтай мэтай, маўляў, штогод у цэнтры бяспекі МНС ладзяцца балі. На іх курсанты МНС і МУС могуць сустракацца і ўжывую знаяміцца са студэнткамі "жаночых" універсітэтаў — мінскага лінгвістычнага ды іншых. "І такім чынам, гэта таксама наша праца, так. Свацці — гэта таксама наша праца", — падкрэслівае Шпілеўская.