Бізнесовец, які пастаўляў запчасткі для гаража Лукашэнкі, прадаў фірму ў Польшчы
Вадзім Грынкевіч / belmarket.by
Буйны беларускі бізнесовец, якога западозрылі ў абыходзе санкцый, прадаў сваю польскую кампанію.
Пасля журналісцкага расследавання Вадзім Грынкевіч прадаў фірму SP Europe, і вялікі лагістычны цэнтр пад Варшавай перайшоў да малавядомага інвестара, які раней быў звязаны з Беларуссю, піша "Бюро".
Новым уладальнікам SP Europe стаў галандзец Паул Боскма. Журналісты высветлілі, што раней ён меў сувязі з бізнесам Грынкевіча.
Летась "Бюро" апублікавала журналісцкае расследаване, прысвечанае дзейнасці міжнароднага холдынгу "Армтэк", які займаецца дыстрыбуцыяй аўтазапчастак ва ўсім свеце. Яго стварылі беларусы Вадзім і Алег Грынкевічы. Журналісты выявілі, што гэтая кампанія абслугоўвала асабісты гараж Аляксандра Лукашэнкі. Таксама холдынг пастаўляў у Расію, якая вядзе вайну супраць Украіны, падсанкцыйныя тавары падвойнага прызначэння – падшыпнікі з Еўропы.
