Беларускія банкі выдалі расійскім прадпрыемствам паўмільярда долараў
Беларускія банкі фінансуюць Расію: гэта забівае мясцовы бізнес / pixabay.com
Беларуская банкаўская сістэма ўсё больш працуе ў інтарэсах расійскіх кампаній, ставячы пад пагрозу фінансаванне айчыннага бізнесу і ў цэлым рост эканомікі. Напрыканцы 2024 года беларускія банкі выдалі расійскім прадпрыемствам не менш за 0,5 млрд долараў. Пра гэта піша ананімны прадстаўнік банкаўскай сферы Беларусі, меркаванне якога апублікавана ў лютаўскім выпуску бюлетэня BEROC.
Чаму беларускія банкі працуюць на Расію?
Манетарная палітыка Беларусі і Расіі рассінхранізаваная. Цэнтрабанк РФ праводзіць жорсткую грашова-крэдытную палітыку, павысіўшы ключавую стаўку да 21%. У сваю чаргу беларускі Нацбанк захаваў нізкія стаўкі і дапускае іх зніжэнне да 9−9,3%.
“Стаўка рэфінансавання ў Беларусі сёння фактычна не ўплывае на кошт крэдытаў і ўзровень інфляцыі. Яна стала паказчыкам, які не карэлюе з рэальнымі ўмовамі рынку”, — адзначае ананімны эксперт.
Розніца ў працэнтных стаўках прывяла да таго, што расійскім кампаніям стала выгадней браць крэдыты ў Беларусі. Толькі ў снежні 2024 года беларускія банкі выдалі расійскім прадпрыемствам не менш за 0,5 млрд долараў пад гарантыі расійскіх фінансавых структур.
