“Беларусьфильм” алічбаваў і выклаў у сеціва ўнікальны фільм

Нацыянальная кінастудыя “Беларусьфильм” алічбавала і выклала ў інтэрнет копію ў высокай якасці фільма “Чужая Бацькаўшчына”, знятага ў 1984 годзе. Карціна адметна тым, што ад пачатку здымалася на беларускай мове, піша канал “Свяшчэнны Белавуд”.

Для савецкага часу гэта было ўнікальнай з’явай, бо большасць фільмаў здымалася, як і сёння, на рускай мове, а потым ствараўся спецыяльны беларускамоўны дубляж.

Драму зняў Валерый Рыбараў, які нядаўна пайшоў з жыцця. Фільм з’яўляецца экранізацыяй раманаў Вячаслава Адамчыка, сюжэт разгортваецца на тэрыторыі Заходняй Беларусі ў 1938 годзе, напярэдадні вайны.