Беларус у Польшчы загінуў пад заваламі гістарычнага будынка, які рамантаваў
Ратавальнікі прыбылі на месца здарэння / старонка Ratownictwo Powiatu Węgrowskiego ў Фэйсбуку
Беларускі рабочы загінуў у польскім горадзе Венгруў (Мазавецкае ваяводства) падчас рамонту гістарычнага будынка.
Трагедыя адбылася 1 сакавіка ў будынку каталіцкай дабрачыннай арганізацыі Caritas. Як піша MOST, падчас рамонтных работ на другім паверсе абвалілася ўнутраная сцяна. Пад завалам апынуўся 52-гадовы рабочы.
На дапамогу прыбылі ратавальнікі, прызямліўся верталёт медыцынскай службы. Але выратаваць жыццё мужчыну не здолелі.
Пракуратура пачала следства, каб выявіць абставіны трагедыі. Эксперты вывучаюць тэхнічны стан будынка, а таксама магчымыя парушэнні тэхнікі бяспекі.
