Беларусь рыхтуецца да рэкорднага выпуску боепрыпасаў і вайсковай тэхнікі: BELPOL
Прамысловасць Беларусі будзе выпускаць сотні тысяч боепрыпасаў і БПЛА да 2028 года / AFP
Беларуская прамысловасць нарошчвае вытворчасць ваеннай прадукцыі. Паводле дадзеных арганізацыі BELPOL, праз два гады Беларусь зможа штогод выпускаць:
— 300 000 рэактыўных снарадаў (па ўдакладненых звестках, раней называлася лічба 240 000);
— 450 000 артылерыйскіх снарадаў;
— БПЛА розных тыпаў, уключаючы распрацоўкі ТАА “СВТ” (“Свіслач СВТ” і “Чакан”), а таксама сістэмы навядзення артылерыі “Вартавы”;
— мадэрнізаваную бранятэхніку з новымі прыцэламі і іншымі паляпшэннямі.
BELPOL раней ужо публікаваў расследаванні аб нарошчванні ваеннай вытворчасці ў Беларусі. Так, у фільме “Зброевы барон-2” прыводзіліся звесткі пра планы выпускаць 240 000 рэактыўных снарадаў у год, але цяпер прагноз павялічаны да 300 000 адзінак.
Нагадаем, што адно з прадпрыемстваў холдынгу "Амкадор" — "Завод СВТ" — развівае вытворчасць дронаў. Паводле дадзеных BELPOL, БПЛА “Чакан” ужо выкарыстоўваецца ва Украіне.
Днямі стала вядома, што Расія прапануе пабудаваць у Беларусі завод па вытворчасці беспілотных авіяцыйных сістэм. Такое прадпрыемства можа выпускаць да 100 тысяч адзінак тэхнікі штогод.
Як адзначае намеснік кіраўніка адміністрацыі прэзідэнта Расіі Максім Арэшкін, “пытанне ідзе пра стварэнне вытворчасці ўсіх ключавых кампанентаў”.
“Гаворка ідзе пра тое, каб выкарыстоўваць тэхналагічныя распрацоўкі і рашэнні, якія ёсць у Расіі”, — адзначыў чыноўнік.
