У заводзе па вытворчасці БПЛА ў Беларусі зацікаўлены найперш Лукашэнка — BELPOL

Планы наконт будаўніцтва ў Беларусі завода па вытворчасці БПЛА ў першую чаргу належаць Лукашэнку. Пра гэта ў каментары Еўрарадыё паведамілі ў арганізацыі BELPOL. Экс-сілавікі кажуць, што даўно атрымлівалі інфармацыю пра гэта. Паводле іх, канчатковага рашэння наконт заводу няма, але Лукашэнка настойвае на ім.

Пра будаўніцтва ў нашай краіне расійскага завода па вытворчасці беспілотнікаў гаворка ішла 6 сакавіка падчас сустрэчы Лукашэнкі з намеснікам кіраўніка Адміністрацыі прэзідэнта РФ Максімам Арэшкіным. Пабудаваць завод плануецца на працягу года. Яго магутнасць павінна скласці да 100 тысяч адзінак за год.

У BELPOL кажуць, што па сутнасці на заводзе будуць выпускацца такія беспілотнікі, якія Беларусь ужо раней пастаўляла ў РФ. Расіяне іх выкарыстоўвалі ва Украіне і засталіся задаволеныя вынікамі.  

"Як раней распавядаў BELPOL, Беларусь ужо пастаўляла ва Украіну такія БПЛА, як "Чакан". Ідзе распрацоўка, выкарыстоўваючы магутнасці ТАА "СВТ", ударнага БПЛА "Свіслач СВТ". Акрамя БПЛА "Чакан" Беларусь пастаўляла таксама БПЛА "Міратворац", "Міратворац-У", "Аскалон" у колькасці 2000 штук. Усе гэтыя БПЛА прызначаныя для паражэння жывой сілы, РСЗА, ЗРК і г.д. Лакалізацыя дадзеных БПЛА ў сярэднім перавышае 80%. Частка дэталяў закупляецца з Кітая", — удакладнілі падрабязнасці ў арганізацыі былых сілавікоў.

Цяпер, паводле інфармацыі BELPOL, агульная колькасць БПЛА розных відаў, якія распрацаваныя ці знаходзяцца ў стадыі распрацоўкі, перавышае 30 відаў. Прычым 90% дронаў распрацоўваюцца выключна для Мінабароны Расіі, а астатнія 10% — на ўласныя патрэбы Беларусі і для паставак у краіны Азіі і Афрыкі.

У BELPOL падкрэсліваюць, што зняцце санкцый з Беларусі дазволіць паскорыць распрацоўку беспілотнікаў, усё больш уцягваючы Беларусь у ваенныя канфлікты.