Беларусь падоўжыла бязвіз для грамадзян Літвы і Латвіі да канца 2022 года

Бязвіз для грамадзян Літвы і Латвіі, якія прыбываюць у Беларусь праз наземныя пункты пропуску, падоўжаны да канца 2022 года, паведамляе Міністэрства замежных спраў.

Да гэтага бязвіз дзейнічаў з 15 красавіка да 15 траўня.

— Практыка "бязвізу" прадэманстравала наяўнасць значнай цікавасці ў замежных грамадзян да Беларусі ... колькасць грамадзян балтыйскіх дзяржаў, якія наведалі Беларусь, няўхільна расла, — піша МЗС.

Таму "з улікам пазітыўных водгукаў і шматлікіх пажаданняў замежных грамадзян кіраўніком беларускай дзяржавы прынята рашэнне аб працягу да канца 2022 года права бязвізавага ўезду, выезду і знаходжання ў Рэспубліцы Беларусь для грамадзян Літвы і Латвіі".

Па запэўненнях МЗС такая практыка дазволіць замежнікам "скласці ўласнае аб'ектыўнае ўяўленне аб сучаснай Беларусі, яе палітыцы і эканоміцы".

Падчас дзеяння месячнага бязвізу Лукашэнка заявіў, што ў заходніх краінах няма крупы і солі. І нібыта жыхары гэтых краін стаялі ў чэргах на ўезд у Беларусь, каб купіць прадукты тут.

У адказ на гэта да беларускай амбасады ў Варшаве прынеслі соль і грэчку.