8 верасня адзначаецца Дзень беларускай вайсковай славы
Святкаванне Дня беларускай вайсковай славы ў Беластоку / facebook.com/novajaziamlia
8 верасня ў Беларусі адзначаецца неафіцыйны Дзень беларускай вайсковай славы — у гонар бітвы пад Оршай 1514 года.
У гэтай бітве войска Вялікага княства Літоўскага, якім камандаваў гетман Канстанцін Астрожскі, разбіла ваяроў Маскоўскага княства, якія спрабавалі заваяваць беларускія тэрыторыі. У Аршанскай бітве ці не ўпершыню ў гісторыі была выкарыстаная палявая артылерыя, што дапамагло князу Астрожскаму атрымаць перамогу.
Аршанская бітва стала адной з найбольш значных перамог войска ВКЛ. Яна дазволіла Вялікаму княству Літоўскаму спыніць утварэнне антыягелонскай кааліцыі ў Еўропе.
У Беларусі святкаванне 8 верасня стала публічным у 1990-х гадах, хаця дзяржаўнага статусу свята не атрымала. У Мінску ладзіліся шматлюдныя мітынгі, шэсці, канцэрты. Таксама свята адзначалі акцыямі ў Брэсце, Гродне ды іншых гарадах. На месцы бітвы пад Оршай праводзіўся бардаўскі фэст "Аршанская бітва".
