40-гадовага беларуса — гандляра зброяй затрымалі ў Варшаве
Затрыманы ў Варшаве беларус / Паліцыя Варшавы
У Варшаве затрымалі 40-гадовага грамадзяніна Беларусі, паведамляе камендатура паліцыі польскай сталіцы. Еўрапейскі ордар на яго арышт выдадзены ў французскім Марселі.
Паведамляецца, што затрыманы мужчына звязаны са злачыннай супольнасцю, якая займаецца незаконным абаротам наркотыкаў, агнястрэльнай зброі і адмываннем грошай. У прэс-рэлізе паліцыянты называюць яго гандляром зброяй.
Затрыманне адбылося ў чацвер на мінулым тыдні ў элітных апартаментах у цэнтры Варшавы. У аперацыі ўдзельнічалі супрацоўнікі антытэрарыстычнага падраздзялення.
Разам з грамадзянінам Беларусі былі затрыманыя трое грамадзян Украіны, якія дапамагалі яму хавацца ад правасуддзя.
Чакаецца, што затрыманага беларуса вышлюць у Францыю.
