30-тысячны Дзяржынск застаўся без гарачай вады і ацяплення

30-тысячны райцэнтр Дзяржынск 19 сакавіка застаўся без ацяплення і гарачай вады.

Як піша мясцовая раёнка, каля 13:30 адбыўся парыў на цэнтральных магістральных цепласетках горада. Ацяпленне і гарачую ваду па ўсім горадзе давялося адключыць, бо аварыя адбылася на цэнтральнай цепласетцы.

Работнікі Дзяржынскага ЖКГ ужо заняліся рамонтам на вуліцы Пралетарскай.

У сувязі з рамонтнымі работамі часова перакрыты рух аўтатранспарту па вуліцы Пралетарскай ад дома 32 па вуліцы Мінскай да Паштовага завулку.

Дарэчы, два тыдні таму падобная камунальная аварыя ўжо здаралася ў Дзяржынскім раёне. Тады без вады заставаліся жыхары часткі пасёлка Фаніпаль, а таксама вёсак Падсасонне і Холма (Фаніпальскі сельсавет).

Падобныя аварыі апошнім часам сталі адбывацца ўсё часцей у розных рэгіёнах краіны, бо інфраструктура патрабуе аднаўлення.