18-ы пакет ЕС цалкам забараняе фінансавыя аперацыі з некалькімі банкамі РБ
Санкцыі, ілюстрацыйнае фота
ЕС цалкам забараніў фінансавыя аперацыі з беларускімі банкамі. Але не з усімі. Абмежаванні, уведзеныя 18-м пакетам санкцый, датычацца толькі чатырох банкаў, якія ўжо былі адключаныя ад SWIFT. Пра ўсю банкаўскую сістэму гаворка не ідзе.
У паведамленіі прэс-службы ЕС напісана, што забарона "абноўленая" ("upgraded"), а абнавіць тое, чаго раней не было, нельга. Адбываецца развіццё ўжо ўведзеных супраць часткі банкаў санкцый, а не ўвядзенне новых.
Ад SWIFT цяпер адключаныя Белаграпрамбанк, "Дабрабыт", Белінвестбанк и "Банк развіцця".
Акрамя таго, пад санкцыі трапілі некалькі беларускіх заводаў ВПК і пастаўкі зброі з Беларусі, а таксама часткі тавараў. Канкрэтныя спісы з назвамі прадпрыемстваў і тавараў пакуль не апублікаваныя. Аднак ёсць неафіцыйныя звесткі, што санкцыі закранаюць аршанскі завод "Легмаш", які адзначыўся працай на расійскі ВПК.
18-ы пакет санкцый супраць Расіі і Беларусі быў прыняты 18 ліпеня. Яго поўны тэкст яшчэ не апублікаваны.
