ЗША аднавілі ваенныя пастаўкі Украіне і перадачу разведданных
Украінскія вайскоўцы, ілюстрацыйнае фота / генштаб Украіны
Адразу пасля перамоваў з Украінай у Саудаўскай Аравіі ЗША аднавілі прыпыненую вайсковую дапамогу і перадачу разведданных, паведамляе Bild.
Аднаўленне ваенных паставак пацвердзіў у сацсетках намеснік кіраўніка Офіса прэзідэнта Украіны Павел Паліса: "Дасягнутыя пагадненні выконваюцца". Польскія СМІ таксама пішуць пра аднаўленне амерыканскіх паставак украіне, якія былі прыпыненыя на тэрыторыі Польшчы.
Таксама ва ўкраінскім урадзе пацвердзілі, што Штаты зноў перадаюць разведвальную інфармацыю. Гэтыя звесткі, у прыватнасці, дазваляюць адсочваць перамяшчэнні войскаў і паветраныя атакі з боку праціўніка.
Тым часам Украіна пачала выводзіць свае войскі з Курскай вобласці Расіі. Расіяне ўвайшлі ў райцэнтр Суджа, які ўкраінцы кантралявалі 218 дзён — ад жніўня 2024 года, піша hromadske.ua.
Аналітыкі мяркуюць, што ўкраінцы маглі б і надалей утрымліваць Суджу. Але ёсць два фактары, якія прымушаюць іх вярнуцца на сваю тэрыторыю. Першы — вайсковы: расіяне апошнім часам актыўна пераразалі лагістычныя ланцужкі, што ўскладніла забеспячэнне ўкраінскай групоўкі ў Курскай вобласці РФ. А другі — палітычны: перамовы пра мір, якія вядзе ЗША.
