Жонка зніклага актывіста Котава падала заяву ў пракуратуру Польшчы

Жонка зніклага палітычнага актывіста Анатоля Котава Анастасія Піліпчык падала заяву ў польскую пракуратуру і наняла адвакатаў у Турцыі, піша Reform.news. Былы чыноўнік і прадстаўнік Беларускага фонду спартыўнай салідарнасці Анатоль Котаў 21 жніўня вылецеў з Варшавы ў Стамбул і знік.

Пасля таго як Котаў паехаў у аэрапорт, ён яшчэ перапісваўся з жонкай, і, паводле яе слоў, паведамленні былі “звычайнымі, адпавядалі тэме і не выклікалі падазрэнняў”.

Апошняе паведамленне Анастасія атрымала 21 жніўня а 21:12 па польскім часе (ў Турцыі было 22:12). Апошняе яе паведамленне, якое прагледзеў Анатоль, было адпраўлена 21 жніўня ў 21:28 па польскім часе, пасля чаго ён больш не выходзіў на сувязь.

Турэцкае выданне IHA паведаміла, што Котаў прыляцеў у стамбульскі аэрапорт 21 жніўня ў 13:49 з Варшавы. У той жа дзень ён вылецеў у турэцкі горад Трабзон, а потым пакінуў тэрыторыю Турцыі а 18:35 праз марскі памежны пункт Трабзона.

Стамбульскае бюро DW пісала, што Котаў адправіўся ў Сочы на прыватнай яхце.

Анатоль Котаў — прадстаўнік Беларускага фонду спартыўнай салідарнасці (БФСС). Скончыў Маскоўскі дзяржаўны інстытут міжнародных зносін (МДІМЗ). Працаваў у МЗС Беларусі, Адміністрацыі прэзідэнта Рэспублікі Беларусь, пасольстве Беларусі ў Польшчы, Нацыянальным алімпійскім камітэце, дырэкцыі Еўрапейскіх гульняў — 2019 і Упраўленні справамі прэзідэнта.

У жніўні 2020 года ў знак пратэсту ён сышоў з дзяржаўнай пасады.

Апошнія гады знаходзіўся ў вымушанай эміграцыі. Котаў уваходзіць у склад Камісіі па этыцы Міжнароднай спартыўнай федэрацыі танца і ў працоўную групу арганізацыі Athletes for Freedom Foundation.

У 2024 годзе Котава завочна асудзілі ў Беларусі на 12 гадоў пазбаўлення волі па абвінавачанні ў змове з мэтай захопу ўлады, кіраўніцтве экстрэмісцкім фарміраваннем і садзейнічанні экстрэмісцкай дзейнасці.