З-за беларускіх паветраных шароў з кантрабандай закрываўся аэрапорт Вільні

Уначы 5 кастрычніка часова закрывалася паветраная прастора над аэрапортам Вільні. Прычынай сталі паветраныя шары з кантрабандай, якія заляцелі з боку Беларусі.

Абмежаванні закранулі 30 рэйсаў і амаль шэсць тысяч пасажыраў. Самалёты, якія павінны былі прызямліцца ў Вільні, накіроўвалі ў іншыя гарады. Пасажырам, што павінны былі вылятаць з віленскага аэрапорта, давялося чакаць да раніцы.

"Усяго ў Літву ўляцелі 25 метэаралагічных балонікаў з Беларусі. 13-14 былі заўважаныя непасрэдна над Вільняй і ваколіцамі. Два з іх — непасрэдна над Віленскім аэрапортам", — паведаміў прадстаўнік Нацыянальнага цэнтра кіравання крызісамі Дарыюс Бута.

Надзвычайная сітуацыя працягвалася з 22:16 4 кастрычніка да 4:50 5 кастрычніка.