Вядома ўжо пра 32 забітых расійскімі ракетамі ў Сумах у Вербную нядзелю
Наступствы расійскага ўдара па Сумах / ДСНС Украіны
Па стане на 14:40 Мінскага/Кіеўскага часу вядома пра 32 забітых расійскімі ракетамі ў Сумах. Сярод іх двое дзяцей.
Яшчэ 84 чалавекі былі параненыя. Выратавальныя працы працягваюцца.
Раніцай 13 красавіка расіяне ўдарылі па цэнтры Сумаў дзвюма балістычнымі ракетамі "Іскандэр". У той час там было шмат мінакоў — непадалёк стаіць царква, дзе свянцілі галінкі вярбы. Адна з ракет пацэліла побач з тралейбусам. Амаль усе пасажыры загінулі.
"Склалася жахлівая традыцыя — пасля кожнага раунда "паспяховых" перамоваў паміж Вашынгтонам і Масквой Расія наўмысна наносіць удары па грамадзянскіх аб'ектах, каб пацвердзіць сваю рашучасць працягваць вайну", — заўважае палітычны аглядальнік Аляксандр Фрыдман.
Пуцін і прадстаўнік Трампа Сціў Уіткаф сустракаліся ў пятніцу. Размова доўжылася 4,5 гадзіны, але пра яе змест і вынікі амаль нічога невядома.
