УСУ абстралялі мост у Херсоне, але ён, падобна, выстаяў — 154-я раніца вайны

Ноччу зноў былі абстраляныя Харкаў і некалькі раёнаў Днепрапятроўскай вобласці. Ужо пад раніцу было "два прылёты ракетамі С-300" у Індустрыяльны раён Харкава, піша гарадскі галава Ігар Церахаў.

"Ратавальнікі ўжо на месцы, разбіраюць завалы. Па іх словах, ахвяраў няма, але гэта пакуль толькі папярэдняя інфармацыя. Хацелася б, каб так і было", — кажа ён.

У Днепрапятроўскай вобласці пад агнём апынуліся Нікапальскі і Крыварожскі раёны.

"Па Нікапальскім раёне вораг двойчы ўдарыў з "Градаў". Выпусціў да 40 снарадаў. У Марганцы параненая 54-гадовая жанчына. Яна ў бальніцы", — распавядае кіраўнік ваеннай абласной адміністрацыі Валянцін Рэзнічэнка. Паводле яго слоў, у горадзе пашкоджаныя 8 пяціпавярховак, бальніца, дзіцячы сад і транспарт прамысловага прадпрыемства. У Крыварожскім раёне абышлося без пацярпелых.

Уначы ўкраінскія вайскоўцы абстралялі Антонаўскі мост — адзіную ў горадзе пераправу праз раку Днепр. Яна мае стратэгічнае значэнне для забеспячэння расійскай групоўкі ў Херсоне і заходняй частцы Херсонскай вобласці. Прадстаўнік адміністрацыі акупаванага Херсона Кірыл Страмаўсаў кажа, што мост ацалеў.  Па яго словах, "мост стаіць" і "гэта не кажа аб тым, што мы павінны нейкім чынам каго-то там спалохацца, куды-то бегчы". Пры гэтым у інтэрв'ю ТАСС ён распавёў, што мост цяпер цалкам закрылі для руху.

Украінскі вайсковы экспэрт Алег Жданаў таксама пацвердзіў, што ў ноч на 27 ліпеня Узброеныя Сілы Украіны абстралялі мост, але адзначыў, што ступень пашкоджанняў пакуль невядомая. Ён таксама падкрэсліў, што знішчэнне Антонаўскага моста "з'яўляецца першачарговай задачай для далейшага выбівання суперніка з правага берага Дняпра і вызвалення Херсона".

Між тым, украінцы кажуць, што замацаваліся на левым беразе ракі Інгулец ў Херсонскай вобласці. Пра гэта паведамляе ВВС са спасылкай на аператыўнае камандаванне "Поўдзень".

"Нашай авіяцыяй нанесеныя ўдары па ворагу [...] знічшаны апорныя пункты ворага ў раёне Андрэеўкі, Белогорки і Благадатнага. Такім чынам, Андрэеўка вызвалена і канчаткова зачышчана ад расійскіх акупацыйных войскаў. Як і Лазовае, дзе нашы войскі некалькімі днямі раней недзейна замацавалі свае пазіцыі", — гаворыцца ў зводцы АК "Поўдзень", апублікаванай у ноч на сераду. Усе чатыры згаданыя вёскі знаходзяцца на рацэ Інгулец, на яе левым беразе, на паўночным усходзе Херсонскай вобласці, у 70-75 км ад Херсона, адзначае ВВС.

Украінскі Генштаб раніцай у сераду паведамляе, што баі ідуць на поўначы і на паўднёвым усходзе ад Бахмута — пад Салядарам і каля Сямігор'я і Кадэмы. Гэта ў 10-15 кіламетрах ад Бахмута. На астатніх участках фронту працягваюцца артабстрэлы і авіяналёты.

У мінулыя суткі расійскія войскі занялі нязначныя пазіцыі на паўночным ўсходзе ад Бахмута і працягваюць весці баі на ўсходзе і поўдні ад Бахмута. Пра гэта пішуць і эксперты амерыканскага Інстытута вывучэння вайны.

Аналітыкі Інстытута спасылаюцца на відэа з геалакацыяй, якое было апублікавана расійскім салдатам. На кадрах ён свабодна ідзе па шашы Бахмут-Лісічанск у вёсцы Берастове — гэта ў 25 км на паўночны ўсход ад Бахмута. Такім чынам Берастове расійскія войскі ўзялі пад кантроль, робяць выснову эксперты.

"На відэазапісе відаць, што Бераставое было практычна зраўнавана з зямлёй расійскай артылерыяй і цалкам знішчана", — гаворыцца ў справаздачы Інстытута. Эксперты мяркуюць, што "расійскія войскі, верагодна, скарыстаюцца гэтай пазіцыяй, каб прасунуцца на паўднёвы-захад ўздоўж трасы Т1302 ў кірунку Салядар і паспрабаваць атакаваць Бахмут з лініі Берастова-Салядар".

ЗША паскораць перадачу Украіне дадаткова чатырох высокамабільных артылерыйскіх ракетных сістэм HIMARS. Пра гэта заявіў міністр абароны Злучаных Штатаў Амерыкі Лойд Осцін кіраўніку ўкраінскага ваеннага ведамства Аляксею Рэзнікаву.

"Осцін запэўніў міністра Рэзнікава, што Злучаныя Штаты рухаюцца, каб як мага хутчэй даставіць тэхніку ва Украіну", — гаворыцца ў паведамленні на сайце Пентагона. Нагадаем, на днях стала вядома, што ЗША даюць Украіне дадатковы пакет вайсковай дапамогі коштам 270 млн долараў, у рамках якога УСУ атрымаюць 4 HIMARS і боепрыпасы да іх, 36 тысяч снарадаў да артылерыі, супрацьтанкавае ўзбраенне, 580 дронаў Phoenix Ghost.

З пачатку вайны Украіна не пастаўляе электраэнэргію ў Расію і Беларусь, піша " Громадське" са спасылкай на "Укрэнерга". Нават захопленая расіянамі Запароская АЭС працуе выключна ў энергасістэме Украіны — па камандах дыспетчарскага цэнтра "Укрэнерга". І ў часова акупаваны Крым украінская электраэнэргія не перадаецца і не пастаўляецца.

"Усе заявы з нагоды далучэння поўдня Украіны да варожай энергасістэмы — фэйк і чарговы інструмент інфармацыйнай вайны супраць нашай дзяржавы з боку краіны агрэсара", — гаворыцца ў заяве кампаніі. На днях расійскія СМІ са спасылкай на ўлады акупаванага Крыма казалі пра "канец энэргетычнай блакады".

Адначасова ўжо на гэтым тыдні Еўрапейскі Саюз можа падвоіць экспарт украінскай электраэнергіі. Пра гэта заявіў еўрапейскі камісар па пытаннях энергетыкі Кадры Сімсан. Яе словы прыводзіць "Інтэрфакс-Украіна". Міністр энергетыкі Украіны Герман Галушчанка са свайго боку адзначыў, што экспарт украінскай электраэнергіі ў еўрапейскія краіны можа стаць прамой заменай расійскага газу.

"Сёння мы экспартуем 100 МВт у Еўропу. Але тэхнічна мы ўжо маглі б павялічыць да 1,5-1,7 тысячы МВт, разумеючы, што гэта можа замяніць да 5-6 мільярдаў кубаметраў расейскага газу па ўкраінскай электраэнэргіяй", — сказаў ён.