Улады ігнаруюць патрабаванні жыхароў Буда-Кашалёва вярнуць праход праз чыгунку

У 2014 годзе перад святкаваннем абласных “Дажынак” у горадзе Буда-Кашалёва Гомельскай вобласці быў пабудаваны бетонны плот, які закрыў праход праз чыгунку. Агароджа адрэзала Залінейны раён ад часткі горада, дзе размешчана амаль уся інфраструктура.

Насельніцтва вымушана пераходзіць праз чыгунку па высокім мосце. Пры гэтым упоперак большасці рэек ад чыгуначнай станцыі цягнуцца пракладзеныя для пешаходаў бетонныя пліты. Астатнія два пуці выкарыстоўваюцца нячаста і толькі для манеўравых саставаў, і жыхары не разумеюць, чаму па іх нельга далей працягнуць праход.

Ад людзей гучаць скаргі і нараканні ў бок уладаў, якія ігнаруць іх просьбы. Жанчына з Гомеля, якая прадставілася Святланай, неаднойчы назірала за пакутамі мясцовых жыхароў:

“Я сама гомельская. У Касцюкоўцы людзі пераходзяць, у самім Гомелі пераходзяць, а тут — гэта ўвогуле здзек, я лічу. Бабуля каціла-каціла гэтую калясачку, а яна сарвалася — туды паляцела”.

Найбольш пацярпелі ад закрыцця праходу пажылыя людзі, інваліды, мамы з каляскамі. 80-гадовы Уладзімір Мікалаевіч, які ідзе, абапіраючыся на кій, вымушаны пераходзіць праз мост амаль штодня:

“Навошта гэты мост, скажыце? Вось у бальніцу хаджу кожны дзень. А што рабіць? Вунь там быў праход. Узялі зачынілі... Вы думаеце я адзін? Я не адзін такі...”.

Жыхары напісалі мноства зваротаў, у тым ліку ў Адміністрацыю прэзідэнта. У адказ ім тлумачаць, што праход зачынены ў мэтах бяспекі. Незадаволеныя, тым не менш, лічаць бяспечным і ранейшае абсталяванне праходу турнікетамі. Дарогу ж па мосце мясцовая пенсіянерка і старшыня вулічнага камітэта Залінейнага раёна Людміла Палякова называе складанай і нязручнай:

“Дарога вельмі складаная, пандусы дрэнныя, немагчыма падняцца. Літаральна некалькі дзён таму быў дождж — цяпер утварыліся дзіркі на сярэдняй частцы дарогі. Мы апынуліся нібы адрэзанымі ад усяго свету. Склалася ўражанне, што кіраўніцтва вобласці нас сёння не чуе і не бачыць, у якіх умовах мы сёння пражываем”.

Людміла Палякова выказвае спадзяванні, што хаця б перад выбарамі народ пачуюць і праход будзе адчынены.