У смаргонскім касцёле павесілі адрэстаўраваны звон XVIII стагоддзя
Звон-сігнатурка / t.me/SvetlyShliah/
У смаргонскім касцёле святога Міхаіла Арханёла павесілі адрэстаўраваны звон-сігнатурку, адліты ў XVIII стагоддзі. Цяпер ён распачынае кожнае набажэнства ў храме.
"Наш новы звон быў адліты 17 чэрвеня 1753 года, — кажа ў каментары shliah.by пробашч парафіі ксёндз Артур Ляшнеўскі. — Знойдзены звон быў старанна адрэстаўраваны, і яму было дадзена новае жыццё. Падчас яго асвячэння ў аўтарак, 4 сакавіка, гэтаму звону было нададзена імя святога Казіміра".
У сігнатурку таксама звоняць падчас малітвы “Анёл Панскі”, як знак памяці аб памерлых. Такі звычай паходзіць з сярэднявечча, калі падчас пандэмій людзі не маглі пахаваць сваіх родных. Адзінае, што яны маглі зрабіць, гэта памаліцца за іх душы і пазваніць у сігнатурку, якая калісьці вісела каля дзвярэй касцёла на вуліцы, адзначае выданне.
