У Пінску завяршылі расследаванне справы па крадзяжы 9 км кабеля
Пінскі міжраённы аддзел Следчага камітэта завяршыў расследаванне крымінальнай справы на групу мужчын, якіх вінавацяць у крадзяжы электрычнага кабеля падземных ліній сувязі.
У каментары БЕЛТА афіцыйная прадстаўніца УСК па Брэсцкай вобласці Марына Дранькова распавяла, што семярых мужчын вінавацяць у крадзяжы, учыненым групай асоб, у буйным памеры. Старэйшаму з абвінавачаных споўнілася 40 гадоў, малодшаму — 23. Іх вінавацяць у крадзяжы маёмасці Брэсцкага філіяла РУП "Белтэлекам".
Паведамляецца, што мужчыны выкопвалі з грунту кабель, здымалі з яго ізаляцыйную абалонку і здавалі як лом каляровага металу. Такімі незаконнымі "землянымі работамі" яны займаліся з 14 траўня па 19 ліпеня 2016 года на тэрыторыі Драгічынскага, Іванаўскага і Пінскага раёнаў Брэстчыны. Зламыснікі ездзілі "на справу" па начах на сваіх аўтамабілях. Па звестках следчых, яны зрабілі каля 30 паездак.
Па словах Драньковай, лінія сувязі часова не выкарыстоўвалася і знаходзілася без напружання. Таму крадзяжы праходзілі незаўважанымі, пакуль на пачатку ліпеня падчас бягучага рамонту інжынер "Белтэлекама" не заўважыў аўтамабіль каля месцазнаходжання кабеля. Ён паведаміў праваахоўнікам, і тыя затрымалі ў лесе падазроных, а таксама выявілі тайнік, у якім было схавана каля 220 м кабеля.
Агулам здабычай зламыснікаў стала больш за 9000 м кабеля. Агульны памер шкоды ад іх дзеянняў ацэнены ў больш як 15 тыс рублёў. Следства наклала арышт на маёмасць падследных такім жа коштам. Падчас разгляду здарэння мужны кампенсавалі каля 8 тысяч рублёў.
Матэрыялы крымінальнай справы вывучаныя пракурорам і накіраваныя ў суд для разгляду.
