У Мінску будаўнікі капаюць на месцы яўрэйскіх могілак: што выявілася ў траншэі

На месцы знесенай Гістарычнай майстэрні Леаніда Левіна ў Мінску на вуліцы Сухой актыўна ідуць будаўнічыя работы. Замест будынка — катлаван і жалезабетонныя канструкцыі, звярнуў увагу канал “Спадчына”. 

Занепакоенасць у аўтара канала выклікае сітуацыя на супрацьлеглым баку вуліцы, дзе пракладваюцца камунікацыі.

Тут размяшчаліся яўрэйскія могілкі, знішчаныя яшчэ ў савецкі час. Цяпер у траншэі знойдзены дзясяткі надмагілляў, а таксама фрагменты цагляных канструкцый.

Некаторыя з іх могуць быць часткамі гістарычнай агароджы або брамы. У катлаване можна пабачыць фрагмент пілястры з фігурнымі кутамі, якая была часткай другога яруса брамы. 

Фрагмент цокальнай часткі брамы з прафіляваным карнізам і даволі якасную тынкоўку, якая захавала арыгінальную геаметрыю і дазваляе вызначыць першапачатковыя колеры.

Гэтыя элементы даюць магчымасць дакладна аднавіць страчаны помнік архітэктуры. Унікальныя фрагменты могуць стаць ключом да рэканструкцыі яўрэйскай брамы, лічыць аўтар канала “Спадчына”.

Па яго меркаванню, галоўнае зараз — захаваць і вывучыць знаходкі. Гарадскія ўлады і яўрэйская грамада павінны зацікавяцца гэтым аб'ектам. Бо адбудова помніка мае значэнне для гісторыі Мінскага гета і яўрэйскай супольнасці.

Нагадаем, што ў снежні 2024 года на гэтым месцы ўлады Мінска пачалі рэканструкцыю Гістарычнай майстэрні. Будынак быў цалкам знесены, нягледзячы на абяцанні аднавіць яго "ў першапачатковым выглядзе".

Паводле афіцыйных заяў, да жніўня 2025 года будзе ўзведзены новы будынак з элементамі старога фасада і прыбудовай са шкла і бетону.

Гістарычная майстэрня была знакавым месцам: па некаторых звестках падчас Другой сусветнай вайны тут хаваліся апошнія вязні Мінскага гета.