У кожнай другой краме гандлёвай сеткі былі пратэрмінаваныя тавары

У Міністэрстве антыманапольнага рэгулявання і гандлю Беларусі расказалі пра вынікі чарговай праверкі. На гэты раз "кантрольна-аналітычныя мерапрыемствы" правялі ў гандлёвай сетцы "Хіт!", якая належыць ААТ "Еўраторг".

Чыноўнікі наведалі крамы і ў Мінску, і ва ўсіх абласцях краіны. Парушэнні правілаў гандлю заўважылі ва ўсіх аб'ектах, якія наведалі. А ў кожнай другой краме былі пратэрмінаваныя прадукты. У краме ў Гомелі з продажу прыбралі 38 хлебабулачных вырабаў і каля 4 кілаграмаў кандытарскіх вырабаў.

Сярод выяўленых парушэнняў таксама "невыкананне пераліку тавараў, абавязковых да наяўнасці для рэалізацыі ў гандлёвым аб'екце" (больш за 70% гандлёвых аб'ектаў), продаж тавараў "без неабходнай і дакладнай інфармацыі", адсутнасць або неналежнае афармленне цэннікаў, продаж свежай гародніны "з прыкметамі недабраякаснасці, якая не адпавядае ўстаноўленым патрабаванням" і эксплуатацыя вагаў, якія не прайшлі своечасовую дзяржправерку.

У Беларусі дзейнічае больш за 1100 аб'ектаў згаданай гандлёвай сеткі.

Раней правяраліся гандлёвыя сеткі "Суседзі" і "Капеечка". Парушэнні выявілі ў 86% і 96% іх правераных аб'ектаў адпаведна. А ў "Святлафора" яны былі ва ўсіх 22 аб'ектах сеткі, якія наведалі чыноўнікі.