У Ізюме ў выніку расійскага ракетнага ўдару загінулі 5 чалавек

РФ працягвае наносіць удары па ўкраінскіх гарадах. У Ізюме Харкаўскай вобласці ў выніку ўдару расійскай балістычнай ракетай (мяркуецца, што гэта быў "Іскандэр") загінулі 5 чалавек (сярод іх — цяжарная жанчына). 55 чалавек пацярпелі. Сярод іх тры дзіцяці. 14-гадовая дзяўчынка знаходзіцца ў цяжкім стане, піша hromadske.ua.

Ракетны ўдар па цэнтры Ізюма адбыўся раніцай 4 лютага. Ракета патрапіла ў адміністрацыйны будынак. Быў пашкоджаны таксама суседні адміністрацыйны будынак і шматпавярховыя жылыя дамы.

Мясцовыя ўлады падкрэсліваюць, што ў тым месцы няма ніякага вайсковага аб'екта.

Распачата дасудовае расследаванне па факце здзяйснення ваеннага злачынства, якое пацягнула гібель людзей, паведамляе Офіс Генеральнага пракурора Украіны.