У Гомелі судзяць маці, якая ўтапіла дваіх маленькіх дзяцей

14 верасня ў Гомельскім абласным судзе пачаўся разгляд крымінальнай справы 25-гадовай мясцовай жыхаркі. Жанчына ўтапіла сваіх дзяцей — двухгадовага сына Савелія і 11-месячную дачку Ангеліну. Яе вінавацяць у забойстве малалетніх, учыненым з асаблівай жорсткасцю.

Па хадайніцтве абвінавачанай суд вырашыў праводзіць слуханні ў закрытым рэжыме, пішуць "Беларускія навіны". Паведамляецца, што жанчына выхоўвалася ў дзіцячым доме. Кажуць, яе бацькі жывыя, аднак лёсам дачкі яны не цікавяцца.

На суд прыйшоў бацька дзяцей Алег — яго прызналі пацярпелым па справе. Ён не быў біялагічным бацькам дзяцей, але прызнаў сваё бацькоўства юрыдычна. У каментары журналістам ён заявіў, што хацеў бы для сваёй былой грамадзянскай жонкі пажыццёвага зняволення. Максімальны ў Беларусі тэрмін для жанчын — 25 гадоў — ён лічыць занадта малым.  

Трагедыя адбылася 7 красавіка. Паводле інфармацыі папярэдняга следства, жанчына ўвечары прымала ванну разам са сваім двухгадовым сынам. Яна ўтапіла  дзіцё ў ванне і трымала пад вадой, пакуль хлопчык не памёр. Потым яна ўтапіла і малодшую дачку. Потым жанчына прыбралася ў кватэры, апранула дзяцей і сама затэлефанавала ў міліцыю.

Паводле некаторых звестак, сацыяльныя службы выяўлялі павышаную цікавасць да дзяцей 25-гадовай Аксаны і нават, нібыта, пагражалі забраць дзяцей. Праўда, у аддзеле адукацыі Навабеліцкага раёна Гомеля кажуць, што дзяцей у жанчыны не збіраліся адымаць. Проста іх непакоіла, што пры наведванні патранажнай медсястры ў кватэры было не прыбрана, а ў мыйцы быў брудны посуд.

Фота: БелаПАН