У Беларусі за парушэнне дзяржсакрэтаў будуць судзіць былога памежніка

У Беларусі за парушэнне дзяржсакрэтаў ("парушэнне патрабаванняў па абароне дзяржаўных сакрэтаў, якое прывяло да цяжкіх наступстваў") будуць судзіць 35-гадовага Руслана Явіцу, былога памежніка, а цяпер айцішніка, удзельніка “круглага стала” Юрыя Васкрасенскага. Яму пагражае да 5 гадоў калоніі. Да суда ён знаходзіцца на волі, піша "Наша ніва".

Крымінальную справу 14 сакавіка пачне разглядаць Мінскі гарадскі суд. Працэс будзе праходзіць у закрытым рэжыме. Сутнасць абвінавачвання невядомая.

Явіца раней быў начальнікам аддзела вайсковай часці в/ч 1250 (фармальна знаходзіцца ў Мінску, але ў яго была брэсцкая прапіска). Якраз у ёй базуецца спецпадраздзяленне памежнікаў "Асобная служба актыўных мерапрыемстваў". Украінцы мяркуюць, што АСАМ займаецца правядзеннем дыверсій, таму ў 2022-м Руслана Явіцу аб'явілі "расійскім дыверсантам" і ўключылі ў базу ворагаў Украіны "Міратворац".

Явіца быў айцішнікам, выкладчыкам і бізнес-трэнерам.