У Беларусі пачалі вырабляць дадатковую абарону супраць дронаў
Бронетэхніка на ўзмацненні аховы мяжы, восень 2024-га / t.me/modmilby/
У Беларусі пачалі вырабляць дадатковую абарону супраць дронаў. Выпускаюцца маскіровачныя камплекты для ўзбраення, тэхнікі і войскаў у палявых умовах. Таксама дапрацоўваецца дадатковая абарона тэхнікі. Пра гэта паведаміў намеснік міністра абароны па ўзбраенні генерал-маёр Андрэй Федзін.
"У вайсковых часцях асвойваецца і ажыццяўляецца ўжо выраб дадатковых сродкаў супрацьдроннай абароны, так званых мангалаў, якімі абсталёўваюцца ўсе падраздзяленні, якія выконваюць сёння... баявую задачу па ўзмацненні дзяржаўнай мяжы", — кажа ён у эфіры "Ваен ТБ".
Беларускае войска спрабуе пераймаць досвед вайны ва Украіне. Першыя "мангалы" пачалі з'яўляцца яшчэ ў 2022 годзе. Тады ж з'явіліся аўтамабілі з кулямётамі. У канцы мінулага года было аб'яўлена пра стварэнне мабільнага комплексу процідзеяння малапамерным дронам. Беларускія вайскоўцы адпрацоўваюць стральбу па беспілотніках з адзіночных аўтаматаў і стрэльбаў, а таксама з антыдронавых "зенітных аўтаматаў".
