Беларускія вайскоўцы вучацца страляць з антыдронавых "зенітных аўтаматаў"
Заняткі ў 11-й асобнай гвардзейскай механізаванай брыгадзе / t.me/zapadny_rubesz/
Беларускія вайскоўцы вучацца страляць з антыдронавых "зенітных аўтаматаў". Гэта ўстаноўка-турэль для барацьбы з БПЛА. На яе звычайна замацоўваюцца чатыры аўтаматы, з якіх можна адначасова весці агонь па паветраных цэлях "на 360 градусаў пад любым вуглом". Заняткі па выкарыстанні "спецыяльнай зенітнай устаноўкі" прайшлі ў 11-й асобнай гвардзейскай механізаванай брыгадзе (дыслакуецца ў Слоніме).
Антыдронавыя "зенітныя аўтаматы" з'явіліся ў беларускім войску восенню мінулага года (тады іх паказалі міністру абароны Віктару Хрэніну). Іх выкарыстоўвала і тэрытарыяльная абарона на Віцебшчыне для адпрацоўкі дзеянняў пры абароне аднаго з прадпрыемстваў ад беспілотнікаў.
Беларускія вайскоўцы летась адпрацоўвалі стральбу па беспілотніках з адзіночных аўтаматаў і стрэльбаў. У канцы года было аб'яўлена пра стварэнне мабільнага комплексу процідзеяння малапамерным дронам.
Расійскія "шахеды" пачалі залятаць у Беларусь у ліпені 2024 года. У канцы жніўня ў Ельскім раёне на Гомельшчыне быў збіты першы расійскі ўдарны беспілотнік.
