Трамп увёў для Індыі дадатковыя пошліны 25% за куплю расійскай нафты
Дональд Трамп / Anna Moneymaker / Getty Images
Тавары з Індыі, якія паступаюць на мытную тэрыторыю Злучаных Штатаў, павінны абкладацца дадатковай пошлінай у памеры 25%. Адпаведны ўказ падпісаў прэзідэнт Дональд Трамп.
Прычынай ён назваў тое, што Індыя купляе нафту ў Расіі.
"Я лічу неабходным і мэтазгодным увесці дадатковую адвалорную пошліну на імпарт тавараў з Індыі, якая прама ці ўскосна імпартуе нафту Расійскай Федэрацыі", — цытуе Бі-Бі-Сі ўказ Трампа.
Раней прэзідэнт ЗША заяўляў, што купляй нафты ў Расіі Індыя ўскосным чынам падтрымлівае вайну супраць Украіны. Індыя ў адказ заяўляла, што Злучаныя Штаты таксама купляюць некаторыя тавары ў Расіі.
Пасля таго, як расійская нафта трапіла пад амерыканскія і еўрапейскія санкцыі, Індыя стала галоўным яе пакупніком. Нафта з'яўляецца галоўным экспартным прадуктам РФ.
