Сям'я экс-міністра прадае дом за 4 млн долараў, а ён зарабляе грошы ў Марыупалі

У мінскім мікрараёне Дразды прадаюць трохузроўневы дом за 4 мільёны долараў. Нерухомасць аформленая на жонку былога кіраўніка МУС Уладзіміра Навумава — 66-гадовую Алу Навумаву. Гэта высветліла выданне "Зеркало" з дапамогай BELPOL.

Дом пабудаваны ў 2006 годзе. У ім зроблены рамонт з дарагіх сучасных матэрыялаў: італьянская плітка, нямецкая сантэхніка ды інш.

Уладзімір Навумаў у студзені 1999-га ўзначаліў Службу бяспекі Лукашэнкі і кіраваў ёй да верасня 2000-га. Беларуская апазіцыя мяркуе, што ў 1999-2000 гадах ён удзельнічаў у фізічнай ліквідацыі палітычных апанентаў Лукашэнкі і расчысціў яму шлях да новага прэзідэнцкага тэрміну.

Потым Навумаў быў прызначаны міністрам унутраных спраў. Гэтую пасаду ён займаў з 2000 па 2009 год.

На пачатку 2010-га з'ехаў у Маскву. Спярша працаваў у дзяржкарпарацыі "Растэхналогіі", потым — у адной з камерцыйных фірмаў, якая займалася пастаўкамі ў Паўднёвую Амерыку. У лістападзе 2023-га Навумаў стаў уладальнікам 75% долі ў кампаніі "Зорка Фуд", зарэгістраванай у Маскве. Гэтая кампанія дзейнічае на акупаваных тэрыторыях Данецкай вобласці Украіны. На пачатку 2023 года яна адкрыла філіял у акупаваным расіянамі Марыупалі. Яго кампанія, як вынікае з паведамленняў, займаецца экспартам сельгаспрадукцыі — пераважна збожжа.