Супрацоўнікам аховы далі права даглядаць людзей у басейнах і гандлёвых цэнтрах

У Беларусі пашырылі пералік грамадскіх месцаў, дзе можна праводзіць асабісты дагляд грамадзян, іх рэчаў, дакументаў і транспартных сродкаў. Адпаведны ўказ падпісаў 6 сакавіка Аляксандр Лукашэнка.

Цяпер асабісты дагляд можна праводзіць у фізкультурна-спартыўных збудаваннях, гандлёвых цэнтрах, аб'ектах культурнай інфраструктуры. Супрацоўнікам ведамаснай аховы далі права праводзіць дагляд людзей на дыскатэках і ў начных клубах.

Таксама ва ўказе вызначаны пералік аб'ектаў, дзе неабходна паставіць ручныя сістэмы трывожнай сігналізацыі ад Дэпартамента аховы МУС. У яго ўключаюцца "аэрапорты, аўтобусныя і чыгуначныя вакзалы, установы адукацыі, гандлёвыя цэнтры, рынкі, аквапаркі, шматфункцыянальныя будынкі, а таксама спартыўна-відовішчныя збудаванні, аб'екты культурнай інфраструктуры, установы аховы здароўя і дзяржаўныя ўстановы сацыяльнага абслугоўвання з колькасцю пасадачных і ложка-месцаў ад 300 і больш, іншыя крытычна важныя аб'екты".