Справу першага намесніка начальніка Белчыгункі накіравалі ў суд

У суд накіравалі справу першага намесніка начальніка Беларускай чыгункі Пятра Дулуба.

Яго затрымалі год таму, і ўвесь гэты час Дулуб знаходзіцца ў СІЗА. Тры мільёны долараў, якія ў яго знайшлі, звернутыя ў даход дзяржавы, паведамляе Генпракуратура.

Чыноўніка вінавацяць у атрыманні хабару ад прадстаўнікоў камерцыйных арганізацый, а таксама наўмысным насуперак інтарэсам службы невыкананні сваіх абавязкаў з карыслівай зацікаўленасці.

У аснову справы следчыя паклалі транзіт вугалю з Казахстана ў Польшчу праз тэрыторыю Беларусі, які "парушыў інтарэсы дзяржаўнай арганізацыі чыгуначнага транспарту".

Таксама Дулуб за грошы садзейнічаў, каб камерцыйныя структуры атрымлівалі неабходныя ім для перавозак вагоны, што належаць Беларускай чыгунцы.